عزيزى / عزيزتى

اذا كنت عضو منتسب لدينا فتفضل بالدخول
او يمكنك التسجيل اذا اردت انت تستمتع معنــا

شكرا لك
مع تحيــات
مــاى ساينس


 
الرئيسيةالمجلةالبوابةالتسجيلاخبـار مصــردخول
نسخـة تجريبية لمنتدى ماى ساينس  نتمنى المشاركة الفعالة والهادفة

شاطر | 
 

 الأستاذ سعيد مقالب . الطبع فيه غالب

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
mido



ذكر

عدد المساهمات : 8
تاريخ التسجيل : 10/12/2009

مُساهمةموضوع: الأستاذ سعيد مقالب . الطبع فيه غالب   الخميس 10 ديسمبر 2009, 3:47 am

السلام عليكم

و عليكم السلام . ايه اللى أخرك يا سوسن المدير سأل عليكى 3 مرات

هو فيه غيره منه لله

سعيد جوزك برضه

انا مش عارفه اعمل ايه فى الراجل ده

عمل ايه تانى

عمله اسود الراجل اصحى من النوم الاقيه كرمش لى الهدوم اللى كنت هاجى بيها النهارده و هو عارف اننا اخر الاسبوع و مافيش طقم تانى مكوى



انتى بتضحكى يا سميرة

اعمل ايه بس هم يبكى و هم يضحك

انا خلاص مش طايقة

اقولك ايه بس راجل صاحى من النوم ضارب بوزه شبرين و انتى جوزك صاحى من النوم يخطط لمقلب جديد

يا ريته يضربه شبرين و لا تلاته حتى بس يسيبنى فى حالى

يعنى هو جوزك ده على طول كده

على طول يا اختى هو حنين اه و كريم و العيبة ما بتطلعش منه بس انا زى ما اكون عايشه مع عيل صغير اللى يشوف تصرفاته ما يقولش ان ده راجل عنده 3 عيال منهم 2 فى الجامعه

لا حول و لا قوة الا بالله العلى العظيم

تصدقى بالله يا سميرة انا كتيرفكرت اسيب له البيت و امشى

هاتمشى تروحى فين و تسيبى عيالك

العيال مش مشكلة المشكلة انى لما جيت اشتكى لاخويا قالى هو فيه ست تسيب بيت جوزها عشان بيحب يهزر و يضحك معاها

بصراحه عنده حق

عنده حق ايه انتى كمان . هو لما يجيبنى من الشغل على ملا وشى بعد ما يخلى البواب يتصل عليا و يقولى شقتكم بتولع يبقى بيهزر انتى ناسية يوميها كان منظرى عامل ازاى و انا طالعه اجرى و باصوت

ده كان يوم منيل ساعتها

و لا لما يتصل يقولى الواد عمر خبطته عربية و انا رايح على المستشفى و اروح الاقيه مستنينى على باب المستشفى و شايفنى نازله من التاكسى باعيط و هو واقف مسخسخ من الضحك

يا عينى يا حبيبتى ده كله الا الخضة على الضنا

ده كله كوم و انه كل شوية يقع من طوله و يعمل نفسه ما بيتنفسش و يخلى العيال يقعدوا يصوتوا عليه . انا خلاص فاض بيا من الراجل ده

طب و العيال يا سوسن

و الله انا ما صعبان عليا الا العيال دى البت ريم من يومين خد موبايلها و هى نايمة و كلم واحدة صاحبتها و قالها انا بابا ريم يا حبيبتى هى مش هاتقدر تيجى النهارده الجامعة عشان مامتها ماتت امبارح بالليل و هى قالت لى اكلمك و راح قافل موبايل ريم

يا نهار ابيض

و شوية و لقينا البيت اتقلب و زمايلها كلهم عندنا و اول ما فتحت الباب البنات قعدت تصوت و هو كالعادة مسخسخ من الضحك

حتى كريم ما سلمش منه كل ما واحد صاحبه يكلمه على تليفون البيت لازم يقعد يكلمه و يعمل فيه مقلب لما الواد كره نفسه و بطل يدى نمرة البيت لحد من صحابه

و طبعا لو بنت اللى بتتكلم بيوقع بينهم

يا ريت يا اختى ما كنتش زعلت . ده مرة كلم واحده زميلته على انه كريم و خد منها ميعاد و لطعها فى الشارع ساعتين بعد ما خبى موبايل كريم و خلى الواد ينزل من غيره



و مرة تانية كلم بنت زميلته على انه كريم برضه و قالها انا عايز اعترف لك بحبى و كان هايجيب للواد مصيبة ساعتها

لأ ده حالته صعبة قوى

طب انتى عارفه ان كريم بيلبس نضارة

اه

تصدقى مزاج عنده يخبى النضارة من الواد لحد ما كان بيعيط بالدموع عشان عايزها . ده مرة خباها له فى الفرن و مرة فى الفريزر طب تصدقى مرة فتح الكيسة بتاعة الكمبيوتر و خباها فيها يومين و ما قالش على مكانها الا لما حلفت عليه يطلقنى لو ما طلعهاش لحد ما الواد دلوقتى بقى بيقفل عليها فى الدولاب لما بيضطر يقلعها

طب انا بقى عندى الحل لمشكلة جوزك دى

قولى ايدى على كتفك

هاقولك ..............

لأ طبعا ما اقدرش انتى اتجننتى ده كان يروح فيها

ما هو لازم يتصدم جامد عشان يحرم يعمل فيكم مقالب تانى

لأ حرام

خلاص انتى حره خليكى كده لحد ما يجننك

و خلص الشغل و فايزة روحت و لقت عمر عمال يعيط

مالك يا حبيبى

بصى ايدى يا ماما

ايه اللى ورم ايدك كده يا حبيبى

مستر على ضربنى

ليه عملت ايه

عشان الواجب

انا مش قلت لك تحضر الجدول قبل ما تنزل عشان بابا ما يشيلش الكشاكيل من شنطتك بعد ما تنام

و الله يا ماما عملت كده بس بابا اللئيم قطع لى صفحتين الواجب و ساب الكشكول فى الشنطة

لأ بقى دى بقت حاجة ما يتسكتش عليها

الو

ايوه يا سميرة اتصرفى لى فى كيس الدم و انا هاكلم ريم و كريم ييجوا بدرى النهارده من الجامعه و هاتفق معاهم على كل حاجة

اخيرا اقتنعتى . بكرة ان شاء الله كيس الدم هايبقى عندك

خلاص يا ولاد عرفتوا هانعمل ايه

اه يا ماما عرفنا

بس ابقى حاسب على اختك يا كريم لحسن تعورها بجد

ما تخافيش يا ماما هاخد بالى وربنا يستر ان شاء الله

خلاص يبقى بكرة ان شاء الله بعد الصلاة تعدى على طنط سميرة و هى هاتديك كيس الدم . و انتى يا ريم عايزاكى تمثلى كويس

ما تقلقيش يا ماما انا هاقوم اشوف على اليوتيوب كل لقطات القتل عشان اعرف امثل صح

على الله بس يجيى بفايده و ابوكم ربنا يهديه

ان شاء الله يا ماما

بعد صلاة الجمعه قامت سوسن تنضف البيت و بعد ما نضفت اوضة ريم طلعت تجرى و هى بتصوت الحقنى يا سعيد

فى ايه يا سوسن

تعالى اتفرج لقيت ايه فى اوضة الهانم

ايه ده

حبوب منع الحمل

سعيد بص لريم و صرخ فيها ايه ده يا بت بتاخدى الحبوب دى ليه

البنت ما نطقتش راح سعيد ضربها بالقلم طاااااااااخ

مش بتاعتى يا بابا

نعم امال بتاعة مين انطقى يا بت انتى متجوزة من ورانا

اه متجوزة عرفى من واحد زميلى

و قبل ما سعيد ينطق كان كريم فى المطبخ و جايب سكينة و ضرب بيها ريم فى بطنها و الدم انفجر وسوسن قعدت تصوت

و سعيد قعد يصرخ البت و الواد راحوا منى البت و الواد راحوا منى البت و الواد راحوا منى الحقونى يا ناس الحقونى يا ناس الحقوووووووووووونى

طبعا سوسن خافت لحسن الجيران يتلموا بجد راحت مقومة ريم و قالت لسعيد ده مقلب يا سعيد ريم كويسة ده مقلب و الله العظيم

سعيد شاف ريم بتقوم و الدم مغرقها قعد يضحك زى المجنون البت و الواد راحوا منى و ما بطلش ضحك و صراخ

سوسن و العيال كانوا هايموتوا من خوفهم على سعيد و لما ما قدروش يسيطروا عليه نقلوه المستشفى

شوفتى شورتك السوده اهوه الراجل اتجنن منك لله يا سميرة

فى ايه بس

سوسن حكت لسميرة على اللى حصل كله

يا نهار اسود حقك عليا و الله ما كنت متخيلة ان الموضوع يوصل لكده اتجنن يا لهوى

انا مش عارفه اعمل ايه و الدكتور بيقول عنده صدمه عصبية شديدة

طب اقولك انا هابعت لك دكتو ايمن ابن خالتى ده دكتور شاطر قوى و لسه جاى من بره و رئيس قسم فى مستشفى العباسية

ابعتيه ربنا يجعل الشفا على ايديه

و دخل ايمن و لقى سعيد قاعد شارد و ما بيتكلمش و كلهم قاعدين حواليه كشف عليه و قال للدكتور هو ما بتكلمش ليه يا دكتور

اصله واخد مهدىء

لأ يا دكتور ده علاجه الكهربا مش المهدىء

بس هو حالته ما تستدعيش كهربا دى صدمة عصبية و ان شاء الله بالعلاج هايخف

حضرتك بتعارضنى ليه انا ادرى بحالته و باقولك الكهربا هى الحل

خلاص اللى تشوفه انت استاذنا

استاذ مين ده حمار

ايه ده بابا انت كويس

ايوه كويس طبعا ده كان مقلب يا تحف انا فى الاول صدقت و كنت باصوت بجد بس اول ما البت ريم قامت كنت ناوى اطردكم كلكم من البيت بس بعد كده قولت لنفسى اعمل انا فيهم مقلب انقح من اللى عملوه فيا

انا قولت كده برضه لما كشفت عليك و لقيتك كويس و بعدين سميرة كانت حكت لى الحكايه كلها

مقلب تانى يا سعيد انت ما بتحرمش طلقنى يا سعيد
الرجوع الى أعلى الصفحة اذهب الى الأسفل
SHETOS
مشرف عـام
مشرف عـام


ذكر

عدد المساهمات : 72
تاريخ التسجيل : 12/11/2009
العمر : 25
المكــان : قنا

مُساهمةموضوع: رد: الأستاذ سعيد مقالب . الطبع فيه غالب   الخميس 10 ديسمبر 2009, 4:55 pm

ههههههههههههههه
شوية مقالب حلوة خالص انا خايف يعمل فينا مقلب

تقبل مروري
الرجوع الى أعلى الصفحة اذهب الى الأسفل
mido



ذكر

عدد المساهمات : 8
تاريخ التسجيل : 10/12/2009

مُساهمةموضوع: رد: الأستاذ سعيد مقالب . الطبع فيه غالب   الجمعة 11 ديسمبر 2009, 3:35 am

شكرا على المرور
الرجوع الى أعلى الصفحة اذهب الى الأسفل
 
الأستاذ سعيد مقالب . الطبع فيه غالب
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: المنتدى الترفيهى :: المنتدى العام-
انتقل الى: